CCCXXI.

1421, November 23. Brünn.

König Sigismund bestätigt und erneuert die Privilegien des Stiftes.

Sigismundus dei gracia Romanorum rex semper augustus ac Hungarie, Boemie, Dalmacie, Croacie etc. rex notum facimus tenore presencium universis. Et si regie celsitudinis circumspecta benignitas consuete liberalitatis munificencia universorum saluti teneatur intendere voluntarios quoque affectare labores, ut subditi optata pace quiescant, ad illorum tamen comoda ardenti zelo vigilanter intendit, qui relictis mundi blandiciis sub habitu et observancia regulari nituntur altissimo in simplicitate mentis et corporis iugiter famulari. Sane pro parte religiosorum . . abbatis et conventus monasterii sancte Marie in Camencz ordinis Cisterciensis devotorum nostrorum dilectorum supplex peticio nobis exhibita continebat, quatenus ipsis et eorum monasterio universa et singula privilegia, litteras, iura, libertates, gracias, concessiones, donaciones et inmunitates eorum predecessoribus et ipsis a predecessoribus nostris dive memorie serenissimis principibus, Boemie regibus et aliis principibus ac quibuscunque aliis Christi fidelibus datas et concessas, data et concessa ac laudabiles eorum consuetudines de innata nobis benignitatis clemencia approbare, ratificare, innovare et confirmare graciosius dignaremur. Nos igitur supradictorum abbatis et conventus monasterii predicti devocionis constanciam, vite puritatem et religionis honorem attenta mentis revolucione pensantes supplicacionibus ipsorum admissis animo deliberato, non per errorem aut improvide, sed sano fidelium nostrorum accedente consilio, ipsis et ipsorum monasterio predicto universa et singula privilegia et litteras predecessorum nostrorum Boemie regum et aliorum quorumcunque principum et Christi fidelium, que et quas super ipsorum opidis, villis, possessionibus, proprietatibus, hominibus, censibus, bonis, areis, allodiis, ortis, pratis, pascuis, silvis, rubetis, molendinis, aquis, piscaturis aquarumve decursibus, cuius agris cultis et incultis et aliis quibuscunque obvencionibus et pertinenciis suis universis racionabiliter obtinuisse noscuntur, necnon iura tam alta quam bassa, libertates, gracias, concessiones, donaciones et emunitates ipsis et eorum monasterio predicto a predecessoribus nostris, Boemie regibus, et aliis principibus ac Christi fidelibus in omnibus suis tenoribus, punctis, clausulis, articulis, sentenciis et expressionibus, prout scripta seu scripte sunt ac si tenores omnium et singulorum presentibus de verbo ad verbum forent inserti, ac eciam ipsorum observancias et laudabiles consuetudines per eos hactenus legittime et laudabiliter observatas, approbavimus, ratificavimus, innovavimus et confirmavimus, approbamus, ratificamus, confirmamus, innovamus et tenore presencium auctoritate regia Boemie graciosius confirmamus, decernentes et volentes expresse, ea omnia et singula perpetuis obtinere temporibus inviolabilis roboris firmitatem. Inhibemus igitur universis et singulis principibus, comitibus, baronibus, nobilibus, militibus, clientibus, capitaneis, officialibus, magistris civium, scabinis, consulibus civitatum, opidorum, villarum et locorum comunitatibus et rectoribus eorundem ceterisque nostris et corone Boemie subditis et fidelibus, ne prefatos abbatem et conventum ac monasterium predictum aut eorum homines et bona adversus nostre approbacionis, innovacionis, ratificacionis et confirmacionis indultum impediant aliquatenus aut molestent aut suos impedire seu molestare permittant, quin pocius manuteneant, protegant realiter et defendant, prout indignacionem nostram gravissimam arcius voluerint evitare, presencium sub nostri sigilli appensione testimonio literarum. Datum Brunne anno domini millesimo quadringentesimo vigesimo primo, in die sancti Clementis pape, regnorum nostrorum anno Hungarie etc. tricesimo quinto, Romanorum XII°, Boemie vero secundo.
Ad mandatum domini regis Franciscus prepositus Strigoniensis.

Or. Perg. An einem Pergamentstreifen das wohlerhaltene königliche S.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.